الضياع إحساس رائع جدا يبعث في النفس ثورة وفوضى عارمة تحفزنا للبحث عن حقيقة ما نمتلك وإن كنا نفتقد الى الأساليب الصحيحة و السليمة لإدارة الممتلكات بكل أنواعها ، فإدارة الممتلكات النفسية و الروحية الغير محسوسة والملحوسه و المحبوسة والمدفوسة في أعماق كل شخص فينا هي أساس كل الممتلكات المادية المتنوعة و المتعددة والمحدودة بصك إلاهي بحث . فمدى قدرتنا على إدارة النفس وترويضها هو النجاح بحد ذاته والعقل بعينه وإن كان البعض يعتبرها نوع من أنواع الموت الإكلينيكي .

 أحبتي لن تتخيلوا حجم المعاناة التي يشعر بها إنسان يشعر بضياعه بتوهانه بانعدام مؤثرات الحياة في عالمه و بخلوها من النبض ، يعني زي ما نقول ميت بس عايش عناد ، عايش بالغصب ومن ذي الهدرة وانتوا وخيالكم وما باقول الواسع لأنه البردين وأكياس السمنت جاهزة فوق الدينا والبترول فل ، يعني بالدارج كيف يطلع الزربيان بدون حوائجه زربيان لذيذ المذاق والنكهة . طبعا إذا كنت ميت جوع والحالة طفر زي الوضع الراهن الساخن بتأكل حتى الريح والتراب بيرجع لك هلوى . المهم خلونا اتفلسف قليل بصراحة الكتابة هنجمة ورعب وإحساس رائع يشبه في روعته يوم استلام الراتب ، طبعا بيطلع الزربيان طعمه ماسخ زي طبخ أبورأس آح وآح من طبخ أبورأس هذا يشتيله بحد ذاته مجلدات أو سيديهات من عدة أجزاء أو فلاش أبو هبشه جيجا عشان ما حد يتفلسف ويقول يا أخي الكاتب هذا قديم من أيام ياربون بس الواحد مضطر لأنه قدة كلع الى نهاية الشهر وقدكم دارين الحياة في اليمن وخصوصا في عدن ، اللعب كله كلع ، ابو الخضرة كلع ابو الروتي كلع ابو الصيد والدجاج كلع اما ابو اللحم الآن بيرجع اللحم شموم داخل مضارب زي حق الاخضرين وعاده كل ما يتطور العالم وينمو وتتعدد صور التكنلوجيا ووسائلها السريعة والمريعة زي الرغوة حق الصابون السائل حق السامان والدسوت والمقالي والمطايب والقلاصات وطبعا ما ننسي الدست الضغاط حق الكسالى ابو تنجيح مخارجة سريع سريع معانا زواج وعاده يخرجوا من القاعة يتشامقوا مشامقة ، المهم تزيد متطلباته ومغرياته التي يسيل لها لعاب كل راغب يعني كمان حساب النت كلع الى نهاية الشهر ما قصرت يا عبدالفتاح تسلم حبيبي ربي يحفظك طبعا لا يروح حسكم بعيد قصدي على صاحب المحل اللي في ركن الحافة حق الاتصالات . هذي الأيام الواحد يحاسب حتى على النخص حقه قده وضع سلتبيس وعاده يفهموك غلط وربي مصيبة .

حين نفتقد الشعور بلذة الحياة وبجمال إحساسها فإنه لأمر رائع ، نعم أمر رائع . لاتفتجعوش خلوكم معي للأخير يمكن أخوكم يقدر يوصل المغزى والمحزى والمعزى المراد شرحه من خلال هذا الموضوع الفلسفي سامحونا القات أحيانا يلعبي كثير ويروح تفكيري دائمآ عند اللي ماهلوش وإن شاء الله أحصله بالله أدعولي قده الحالة فوش . المهم نرجع للأهم اللي هو الضياع الله يضيع اللي ضيع نحنا وخلانا نتخبط زي الهندول حق جدتي صالحة الله يرحمها ويغفر لها ويجعل مثواها الجنة قولوا آمين ايوة كذا عجبتمونا التفاعل مطلوب حتى وإن كان معطوب قده في الأخير اسمه ردة فعل وعشان ما يقولوا الرجال جنن ويكلم نفسه عادي والله واللي بيقول جنن مسامح دنيا واخرة جنان يخارجك ولا عقل يحنبك ويلبصك ويصبطك زي الشنجم أبو طابع .

الضياع أنا أقلكم من وجه نظري المتواضعة تواضع المولعي عند المقوت مرض صحي وسليم ويدل بكل الأدلة على أن الشخص سليم ومعافى ويسير في الطريق الصحيح نحو إيجاد ما يبحث عنه طيلة سنواته الصعبة والمتعبة والمليئة بالفراغات والمسافات يعني لا تيأس إذا أحسست عزيزي القارئ بشعور الضياع لأن الضياع ماهو الإ طريق وممر ونفق يمكن يجزع من فوق ويمكن من تحت واحيانا يشق بعنفوانه صخور الجبال حب الانطلاق والاندفاع والتقدم بغض النظر عن مدى صحة المسار الذي نحن عليه وطبعا الصح والغلط  بالعقل ومن قبله الضمير يعني تقديري مش مجنانه لذا هو نشاط صحي وسليم لأن الحركة بركة يعطيك الصحة والعافية يا جدتي الغالية بركة محفوظ وعجبتينا لما بطلتي المداعة عشان صحتك لأن المداعة جزء من منظومة الضياع وبرضه أرجع وأقول الله يضيع اللي ضيع نحنا أتعبني ولاكن الله يتعبه الله يشحططه الله ينتفه نتف زي الدجاجة أبو 300 واللي ما حد يشتريها .

الخلاصة:

ضيعوا كما شئتم ، سيروا بقوة بعنفوان بتوهان وعادي لو الواحد غوان البلاد هذي ما تخلي حد في حاله وكل واحد يخلي باله من ؟!!!! طبعا فهمتمونا ولا بعدين يقولوا على أخوكم  بلا أدب مش محترم اهله ماربونوش ما شاء الله عليهم بالشرف أمانة ولا أمانة العاصمة لاكن وقت القريط من تحت الطراحة عشان ماتضربهمش الريح  مساكين ويسقعوا .

   ضيعوا ضيعوا كما شئتم لكن لا تطيلوا الضياع لأن القدر لا ينتظر أحدا .